ریاض (نیوز اسٹوڈیو): سعودی عرب میں 23 ستمبر کو 95واں قومی دن بھرپور جوش و جذبے کے ساتھ منایا جائے گا، اس موقع پر ملک بھر میں عام تعطیل کا اعلان کیا گیا ہے۔
یہ دن بانیِ مملکت شاہ عبدالعزیز کے اُس تاریخی فرمان کی یاد دلاتا ہے جس کے تحت 1932 میں نجد اور حجاز کو متحد کر کے ایک ریاست کی بنیاد رکھی گئی، جو بعد میں “سعودی عرب” کہلائی۔
عرب میڈیا کے مطابق قومی دن کو پہلی بار 1965 میں شاہ فیصل کے دور میں منایا گیا، جبکہ 2005 میں شاہ عبداللہ کے فرمان کے بعد اسے سرکاری تعطیل کا درجہ دے دیا گیا۔
اس سال کا تھیم: “ہمارا فخر ہماری فطرت میں ہے”
جنرل انٹرٹینمنٹ اتھارٹی نے بتایا کہ اس سال قومی دن کو “ہمارا فخر ہماری فطرت میں ہے” کا نام دیا گیا ہے، جو سعودی عوام کی ثقافتی روایات اور قدرتی ورثے کو اجاگر کرتا ہے۔ اس تھیم میں مہمان نوازی، جرات، وقار، سخاوت اور بلند حوصلے جیسے اوصاف کو نمایاں کیا گیا ہے۔
تقریبات اور سرگرمیاں
یومِ قومی کے موقع پر ملک بھر میں شاندار تقریبات ہوں گی جن میں:
- آتشبازی کے مظاہرے
- ڈرون شوز
- سعودی ہاکس کے فضائی کرتب
- ثقافتی پروگرام اور روایتی رقص
- مختلف نمائشیں شامل ہیں۔
ریاض، جدہ اور دمام سمیت بڑے شہروں میں مرکزی تقریبات منعقد ہوں گی جبکہ اہم عمارتوں کو سبز روشنیوں سے جگمگایا جائے گا۔
عوامی جوش و خروش
ہر سال کی طرح اس مرتبہ بھی سعودی شہری اور غیر ملکی باشندے قومی رنگوں میں ملبوس ہو کر، سبز پرچم لہرا کر اور ملی جوش و جذبے کا مظاہرہ کر کے اس دن کو یادگار بنائیں گے۔
