لاہور — پاکستان شوبز کی معروف اداکارہ اریج فاطمہ نے پہلی بار انکشاف کیا ہے کہ وہ ایک نایاب اور تیزی سے پھیلنے والے کینسر کوریوکارسینوما میں مبتلا رہ چکی ہیں، لیکن اب صحتیاب ہو چکی ہیں۔
زندگی کا مشکل موڑ
اریج فاطمہ نے سوشل میڈیا پر اپنی چند تصاویر شیئر کرتے ہوئے بتایا کہ ان کی زندگی معمول کے مطابق اچھی گزر رہی تھی اور وہ لمبی عمر کی امید رکھتی تھیں، مگر اچانک انہیں اس مہلک بیماری کی تشخیص ہوئی جو عموماً مولر پریگننسی کے بعد پیدا ہو سکتی ہے۔
انہوں نے کہا کہ پچھلے چار ماہ ان اور ان کے اہلِ خانہ کے لیے نہایت کٹھن رہے۔ کینسر سے جنگ کے دوران وہ اس بیماری کے بارے میں کسی سے بات نہیں کرنا چاہتی تھیں، کیونکہ انہیں خوف تھا کہ لوگ مذاق اڑائیں گے۔
ڈرا دینے والے خوف اور امید کی کرن
اریج فاطمہ نے بتایا کہ اس دوران ان کے دو بڑے خوف تھے — اللہ کے سامنے جواب دہی اور اپنے خاندان کے مستقبل کا خیال۔ بیماری سے صحتیابی کے بعد انہوں نے اسے اپنی “دوسری زندگی” قرار دیا اور کہا کہ یہ سب اللہ کے کرم اور خاندان کی سپورٹ سے ممکن ہوا۔
مداحوں کے لیے پیغام
اریج نے کینسر سے متعلق آگاہی دیتے ہوئے سب کو مشورہ دیا کہ باقاعدگی سے میڈیکل چیک اپ کروائیں تاکہ بیماری کا بروقت پتا چل سکے۔
ذاتی زندگی اور کیریئر
یاد رہے کہ اداکارہ نے 2017 میں ڈاکٹر عزیر علی سے شادی کی اور اب وہ دو بیٹوں کی ماں ہیں۔ اریج اپنے خاندان کے ساتھ امریکی ریاست اوہائیو میں رہائش پذیر ہیں اور شوبز کو خیرباد کہنے کے بعد ڈیجیٹل کریئیٹر اور انفلوئنسر کے طور پر کام کر رہی ہیں۔
اریج فاطمہ نے 2019 میں کامیاب ڈرامہ “حسد” کے بعد شوبز چھوڑ دیا تھا۔ ان کے دیگر مشہور ڈراموں میں “ایک پل”، “آپ کے لیے”، “عشق پرست” اور “ہم نشین” شامل ہیں۔
