شوبز انڈسٹری غم میں ڈوب گئی، مداحوں کا اظہار افسوس
پاکستان کے سینئر اور نامور اداکار انور علی طویل علالت کے بعد انتقال کر گئے۔ وہ گزشتہ کئی دنوں سے پھیپھڑوں اور گردوں کے عارضے میں مبتلا تھے اور زیرِ علاج تھے۔
گزشتہ شب طبیعت زیادہ خراب ہونے پر انہیں رائیونڈ روڈ کے ایک ہسپتال میں منتقل کیا گیا، جہاں وہ جانبر نہ ہوسکے اور 71 برس کی عمر میں خالقِ حقیقی سے جا ملے۔
انور علی کا شمار پاکستان کی فلم، ٹی وی اور اسٹیج کے بہترین فنکاروں میں ہوتا تھا۔ خاص طور پر ان کے مزاحیہ کردار اور منفرد انداز نے شائقین کو ہمیشہ محظوظ کیا۔ وہ اپنے بے مثال طنز و مزاح کے ذریعے لاکھوں مداحوں کے دل جیت چکے تھے۔
ان کے انتقال کی خبر سن کر شوبز انڈسٹری کے ستارے، ساتھی فنکار اور مداح افسردہ ہیں۔ متعدد فنکاروں نے سوشل میڈیا پر ان کے فن کو خراجِ تحسین پیش کرتے ہوئے کہا کہ انور علی جیسے اداکار بار بار پیدا نہیں ہوتے۔
مرحوم کی نمازِ جنازہ اور تدفین کے حوالے سے تفصیلات تاحال سامنے نہیں آئیں۔
